ಈಳೆ ನಿಂಬೆ ಮಾವು ಮಾದಲಕ್ಕೆ ಹುಳಿನೀರೆರೆದವರಾರಯ್ಯಾ? ।। ವಚನ ವಿಶ್ಲೇಷಣೆ ।। ಅಕ್ಕಮಹಾದೇವಿಯವರ ವಚನ

 ಶ್ರೀಗುರು ಬಸವಲಿಂಗಾಯ ನಮಃ 

(ಈ ವಚನದ ಸರಳ ವಿಶ್ಲೇಷಣೆಯ ಸಂಪೂರ್ಣ ಚರ್ಚೆಯನ್ನು ವೀಕ್ಷಿಸಲು ಯೂಟ್ಯೂಬ್ ಲಿಂಕ್ ಬಳಸಿ) 

ಈಳೆ ನಿಂಬೆ ಮಾವು ಮಾದಲಕ್ಕೆ ಹುಳಿನೀರೆರೆದವರಾರಯ್ಯಾ? 

ಕಬ್ಬು ಬಾಳೆ ಹಲಸು ನಾರಿವಾಳಕ್ಕೆ ಸಿಹಿನೀರನೆರೆದವರಾರಯ್ಯ? 

ಕಳವೆ ರಾಜಾನ್ನ ಶಾಲ್ಯನ್ನಕ್ಕೆ ಓಗರದ ಉದಕವನೆರೆದವರಾರಯ್ಯಾ?

ಮರುಗ ಮಲ್ಲಿಗೆ ಪಚ್ಚೆ ಮುಡಿವಾಳಕ್ಕೆ ಪರಿಮಳದುದಕವನೆರೆದವರಾರಯ್ಯಾ? 

ಇಂತೀ ಜಲವು ಒಂದೆ, ನೆಲನು ಒಂದೆ, ಆಕಾಶವು ಒಂದೆ. 

ಜಲವು ಹಲವು ದ್ರವ್ಯಂಗಳ ಕೂಡಿ ತನ್ನ ಪರಿ ಬೇರಾಗಿಹ ಹಾಗೆ, 

ಎನ್ನ ದೇವ ಚೆನ್ನಮಲ್ಲಿ ಕಾರ್ಜುನಯ್ಯನು ಹಲವು ಜಗಂಗಳ ಕೂಡಿಕೊಂಡಿರ್ದಡೇನು? ತನ್ನ ಪರಿ ಬೇರೆ.

    ಈ ವಚನದಲ್ಲಿ ಅಕ್ಕ,  ಜಗತ್ತಿನಲ್ಲಿ ಹಣ್ಣುಗಳು ಹುಳಿ, ಸಿಹಿ, ಧಾನ್ಯಗಳು ಮತ್ತು ಹೂವುಗಳು ವಿವಿಧ ರುಚಿ ಹಾಗೂ ಸುವಾಸನೆಗಳನ್ನು ಹೊಂದಿದ್ದರೂ, ಅವೆಲ್ಲಕ್ಕೂ ನೀರು, ನೆಲ ಮತ್ತು ಆಕಾಶ ಒಂದೇ ಆಗಿರುವ ಬಗ್ಗೆ ಅಕ್ಕ ಪ್ರಶ್ನಿಸುತ್ತಾರೆ. ಎಲ್ಲ ದ್ರವ್ಯಗಳಿಗೂ ಒಂದೇ ಮೂಲ ಜಲವಾಗಿದ್ದರೂ, ಅದು ಬೇರೆ ಬೇರೆ ರೂಪಗಳನ್ನು ಹೇಗೆ ಪಡೆಯುತ್ತದೋ, ಹಾಗೆಯೇ ಚೆನ್ನಮಲ್ಲಿಕಾರ್ಜುನನು (ಪರಮಾತ್ಮನು) ಹಲವು ಜಗತ್ತುಗಳಲ್ಲಿ ನೆಲೆಸಿದ್ದರೂ, ಆತನ ಮೂಲ ಸ್ವರೂಪವು ಭಿನ್ನವಾಗಿ, ಅನನ್ಯವಾಗಿ ಉಳಿದಿದೆ ಎಂಬುದನ್ನು ಈ ವಚನ ಪ್ರತಿಪಾದಿಸುತ್ತದೆ. ಇದು ಸೃಷ್ಟಿಯ ವೈವಿಧ್ಯತೆ ಮತ್ತು ಸೃಷ್ಟಿಕರ್ತನ ಅನಂತ ಸ್ವರೂಪದ ಕುರಿತಾದ ಅಕ್ಕನವರ ಅನುಭಾವಿಕ ಚಿಂತನೆಯನ್ನು ಅನಾವರಣಗೊಳಿಸುತ್ತದೆ.